Күндү форум олохтоохторо!
Бу форум Дьоһун саас форуму кытта холбонно, саҥа холбоһуктаах форум Сахалыы диэн ааттаах.
Бу сирэйгэ саҥа теманы эбэтэр комментарийы суруйуу кыаллыбат, ол гынан баран холбоһуу иннигэр суруллубуту ааҕар кыах хаалар.
Саҥа Сахалыы холбоһуктаах форумҥа киириҥ, кэпсэтиҥ!
Иккистээн биир ууга киирбэттэр
Кыраһа суруга  -    5490
Үлэ чааһа бүтэн эрэр...Монитор иннигэр отуччалаах эдэр киһи В Контакте көрө олорор. - Оо бу оҕолор кыра эрдэхтэринэ шашлыктыы сылдьан, бу Күрүлүүргэ сөтүөлүү сылдьан, бу Саҥа Дьылга бары бииргэ..Үчүгэй да кэмнэр этэ..Эх Настя, Настя хайдах итинник буолбуккунуй?
Санаа ситимин аан тыаһа быста. Коллегата Айта киирдэ. Никита түргэн соҕустук ВК саба оҕуста. Айта элэс гынан көрө оҕуста уол эмиэ урукку олоҕун көрөн санаарҕыы олорорун. Кыыс билэр, коллегата аҕыйах сыллааҕыта олоҕо алдьаммытын. Никитаны кэргэнэ таҥнаран эдэр киһиэхэ иирэн барбытын. Уол төһө да дьоҥҥо туох да буолбатаҕын курдук тутуннар иһигэр олус санаарҕыырын сэрэйэр.
Никита өрүү бу курдук хаартыскалары көрө олорон урукку олоҕун эргитэ саныыр. Ханна сыыспытын, тоҕо маннык буолбутун. Кини кэргэнинээн Танялыын 14 сыл дьоллоохтук олорбуттара, арай Никита үлэтинэн өрүү ыраах командирлвкаларга барара, ревизор буолан дьиэтигэр көстүбэт этэ. Ол күҥҥэ диэри, биир күн кэлбитэ дьиэтигэр ким жа суох этэ, аанын арыйан киирбитэ остуолга сурук сытара - Прости, мы слишком разные, я встретила свою любовь, дети будут жить у моей мамы.. Бүттэҕэ ол.
Ол кэннэ суутунан арахсыбыттара, дьиэлэрин аҥаардаспыттара. Эр киһи уопсайга хос ылбыта. Дьахтар куорат кытыытыгар икки хостоох хрущевка. Саҥа киһитэ киниттэн 12 сыл балыһа. Сүүрбэтин саҥа ааспыт эдэр уол. Никита командировкаҕа сырыттаҕына клубка билсибиттэр.
Айта урут көрөр этэ Никита кэргэнэ бу үлэлэригэр документ распечаткалыы, кэргэнин үлэтиттэн тоһуйа массыынанан кэлэрин. Сүрдээх деловой, сытыы хотуу, бэйэтин сааһыгар сүрдээх эдэр.көрүҥнээх дьахтары. Фитоняшкалар диэн манныктары этэллэр дии.саныыра. Спортзалы көтүппэккэ сылдьара быһыытыттан таһаатыттан биллэрэ, уонна бэйэтэ Өлүөхүмэ бааһынайа буолан отучча сааһыгар уон аҕыстаах курдуга. Көрдөххө Никита кинини сүрдээх атаахтатар курдуга. Сотору сотору соҕуруу соҕотохтуу сынньата ыытара, дьахтар таптаабытынан араас инстаграмм көрө көрө кэргэнин хамнаһын сыаналаах дьиэ ремонугар барыыра, права, крутой массыына атыылаһыннарбыта. Дьэ итини этэн эрдэхтэрэ олох үрдүгэр ытыннардаҕа диэн.
Ответов 9
  • Кыраһа суруга
    28 апреля 2020
     

    Никита арахсан баран олох кыргыттарга сүрэх бааһа буола сылдьар. Араас эдэр дьахталлары кытта билсэ сырытта эрээри сүрэҕэ син биир туоххаһыйар, урукку олоҕун ахтар-суохтуур, Таняҕа тэҥнээн көрөр. Төһө да оннук ардыгар урукку олоҕун сытыытык ахтар кэллэр сүрэх бааһа аата сүрэх бааһа. Хас биирдии кэрэ аҥары бастаан эрэ үчүгэйин аанньа олох хайа эрэ түгэнигэр көхсүттэн оҕунан ытыа диэн сэрэхэчийэр санаата суох буолбатах, баар.
    Аны кэнникинэн соҕотоҕун да олоро үөрэнээри гынна. Дьэ ол куһаҕан. Сылтан сыл дьон сүрдээх бириинчик буолаллар үһү соҕотоҕун олоро үөрэнэн, атын киһини дьиэҕэ тулуйбаттар диэн этэллэр. Оннукка тиийбэтэх киһи. Киһи бу олоххо олох олороору кэлэр, кимиэхэ эрэ, кимнээххэ эрэ наада буолаары. Кэргэҥҥэр, оҕолоргор. Билиҥҥитэ оҕолорунаан кэм билсэр, ардыгар кэлэн хонон бараллар. Арай ханыыта суох. Олоҕун оҥостуон наада. Киһи ханыылаах буолара ордук.
    Холобур бу бииргэ үлэлиир доҕоро Айта. Бэйэтин курдук эмиэ аҕыйах сыллааҕыта арахсыбыт. Кэргэнэ эмиэ эдэргэ иирэн барбыт. Кыра кыыс оҕолоох.
    Киэһэ алтаны ааста. Күннээҕи хаалбыт үлэлэрин үмүрүтэ олорон коллегалыылар бириэмэ хайдах ааспытын өйдөөбөтүлэр даҕаны.
    - Һуу, йоошка чаас ырааппыыт, детсаппар хойутаатыым! Эмиэ баспытааталтан мөҕүллэр буоллуум, саатар абааһы сорок первай автобус киэһэ олох сылдьыбат! - Айта саҥа аллайда.
    Никита ходьох гына түстэ. Эмискэ кини эмиэ санаан кэллэ урут уолун кыра Ньукуусканы эмиэ детсаттан ыла барарын, хайдах курдук кыра Ньукуу илиитин даллатан, күдэн чаҕаарыйа чаҕаарыйа аҕатыгар сүүрэн кэлэн куустуһа түһэрин. Санаалыын сырдаата..
    - Айта оттон мин эйигин быраҕан биэриэм ээ?
    - Ээ, хайдах эрэ, Туллукчаан детсад ырааҕын бэйэҥ билэҕин, Билибина..Ээ мин биллим, мин эйиэхэ такси Индрайвер курдук икки аҥаар мөһөөх биэриэм, саатар.бензиҥҥын сабыныаҥ буо?
    - Ээ, чэ Айта никаких Индрайверов, ыл таҥын да бардыбыт - уол мүчүк гынан мичээрдээн эрэ кэбистэ.

    0
  • Кыраһа суруга
    28 апреля 2020
     

    Киэһээҥҥи Дьокуускай устун сырдык уулусса устун аргыый массыына сырылатан иһэр.
    - Айта дьикти баҕайытык оҕоҕун ыраах баҕайы детсадка сырытыннарар эбиккин дии, тоҕо? - Никита ыйытар
    - Ээ, бары инньэ диэн ыйыталлар тоҕо эрэ - Айта күлэр үрүҥ тиистэрэ кэчигириир - Тоҕо диэтэргин мин сахабын, оҕом эмиэ саха, ол иһин сахалыы детсадка сырытыннарабын. Бэйэҥ билэриҥ буолуо дии, обычнай куорат детсадыгар сылдьыбыт оҕо олох тоҥ нуучча буоларын, мин оннугу баҕарбаппын.
    Никита массыына ыытан иһэн санаата - Айта чахчы толкуйа, өйө санаата барыларыттан атын соҕус эбит, дьикти, ураты үчүгэй санаалаах..Хаарыаны, үчүгэй да кыыс, хайа эрэ дьоллоох уолга түбэһэр..
    Бу айаннаан иһэн кини Айтаны дьэ саҥаттан өйдөөн көрбүт курдук буолла. Чахчы да Айта сахаҕа үчүгэй кыыс, уһун дьылыгыр, көнө уҥуохтаах, үүн.тиэрбэһин курдук төгүрүччү көрбүт буспут хара моонньоҕон харахтардаах, оскуола оҕотун курдук оҕотук чуолкалаах эҥин. Ол эрээри уол кинини күн бүгүнүгэр диэри көннөрү доҕор, коллега,.балтын курдук көрөн кэллэ. Онтон бу билигин эмискэ Айта ис санаатын кыл.түгэҥҥэ кыратык сэрэтэр ылбытыгар, бу күлэ үөрэ сырдыктык мичээрдии олорорун көрөн, эмискэ сылаас санаа долгуна имэрийэ кууста..
    - Чээн, үчүгэйиэн барахсаан..Ол санаатыттан уол бэйэтэ да соһуйда.

    0
  • Кыраһа суруга
    28 апреля 2020
     

    Детсадтан мааны да мааны кыра Хаарчаана курдук кыыс оҕо моторуллан тахсан ийэтин кытта олорустулар. - Дядя Никита здравствуйте, мин аатым Снежана диэн - кыракый сүрдээх чобуо, сахалыы оһуордаах дьабака бэргэһэлээх кыыс оҕо тутатына бэйэтин билиһиннэрбитинэн киирдэ.
    - Тыый, дьиҥнээх Хаарчаана эбиккин дии! Оттон мин эйигин дьиҥнээх Дед Мороз сиэнэ Хаарчаана киирдэ дии санаатым ээ! - Никита оҕону кытта өрүү оҕо буолар киһи бу да сырыыга хаалсыбата.
    Бары көрдөөхтүк күлэн тоҕо бардылар.
    Никита маннык түгэни билбэтэҕэ ырааппыт. Онтон санаалыын да сырдаата. Оо.арай маннык семьялааҕа буоллар. Киэһэ аайы кэргэнинээн кэлэн маннык оҕолорун детсадтан илдьэ барар..
    Билигин мантан киэһэ кини эмиэ соҕотох, тоҥ хаһаа, иччитэх дьиэтигэр.төннүө, онно кинини ким да күүппэт, кини кимиэхэ да наадата суох...
    Арай бу үчүгэй киһиэхэ Айтаҕа кыра да буоллар үтүөнү оҥоро, санаата кыратык да буоллар уоскуйа сырыттаҕа...
    Дэлэҕэ да өбүгэлэр этиэхтэрэ дуо - Тэбиэн саҕа хара санаатааҕар түөн саҕа үтүө санаа ордук - диэн...

    0
  • Кыраһа суруга
    28 апреля 2020
     

    Эмискэ оннук саныы олордоҕуна - Бачча биһиэхэ үтүөнү оҥорбут киһиэхэ, .биһиги хайдах махтанабыт.Снежка? -.диэн Айта чугдаархай куолаһа санаа далыттан уолу таһаарда.
    - Оттон бүгүн маама миэхэ бэрэскии буһараар, дии маама?
    - Оо дьэ оҕом барахсан туох баар сэкириэппиттин.барытын дядя Никаҕа арыйа олорор - Айта күлэр.
    - Тадаам, хата биһи дядя Никаны оҕобунаан в гости ыҥырабыт на пирожки, отказы не принимаются! - Айта тэбэнэттээх баҕайытык уол диэки көрөн ылар, кыыс хараҕар үөрүү кыымнара онньуулар.
    Никита өйдөөбөккө да хаалла Айталаах, Хаарчаана кинини тылларыгар киллэрэн дьиэлэригэр ыалдьыттата киллэрбиттэрин...

    0
  • Кыраһа суруга
    28 апреля 2020
     

    Үчүгэйин дьиэ кэргэн эйгэтэ..Ээ ханнааҕы дьиэ кэргэн? Никита бэйэтин санааларыттан күлэн ылла. Көннөрү маннык сылдьыбатаҕа ырааппыт. Сылаас эйгэ, остуол тула олорон бэрэскии малааһын..
    - Кырдьык туох эрэ семья курдукпут - Айта күлэр - Эс наһаа дии, но дружеский ужин никто не отменял- диэн эбэр.
    Никита бастакытын бүтэһик сылларга дьиэтигэр барыан олох баҕарбата, ыксаабата.
    Айта түргэнэ-тарҕана, уурбут-туппут курдук туттуута-хаптыыта. Сотору буолаат остуолга бэрэскии өрөһөлүү кыстанна.
    Сылаас үүттээх чэй иһэ, бэрэскиилэрин.амсайдылар. - Кыра сирдээҕи дьол диэн бу буоллаҕа -.дии санаата Никита.
    Чэйдээн баран Айта дьиэтээҕи библиотекатын көрдөрдө. Бу икки полка барыта саха классиката. - Төлкө, Тоҕой Сэлэ, Саааскы Кэм,бу Семен, Софрон Даниловтар...Төлкөнү аахпытыҥ? Мин ааҕан баран наһаа сөхпүтүм, мааныга улааппыт баай кыыһа дьадаҥы уолу таптаан кый бырах барбытын, Һуу мин оннук таптаатахпына, таптыыр киһим туһугар барытын кэрэйбэккэ барыам этэ дуу?
    Уол сөхтө. Кини Айтаны үлэтинэн эрэ билэ сырыттаҕа. Бииргэ үлэлээбиттэрэ иккис сыла. Ол эрээри кини бүгүн Айтаны саҥардыы билсиһэн эрэр курдук. Кини дууһата баайын, олоххо көрүүтэ кини урукку кэргэнинээҕэр тосту уратытын, олоҕу сыаналыырын.
    Бу кэмҥэ сиэбигэр телефон тыаһаата. Экраҥҥа Таня диэн сурук таҕыста. Эмиэ да долгуйда, эмиэ да урукку хомойбут, кэлэйбит абата саба халыйан кэллэ, ылан арааран кэбистэ.
    Звонок эмиэ эрийдэ, бу сырыыга өсөһөн туран эрийдэ.

    0
  • Кыраһа суруга
    28 апреля 2020
     

    Хас сыл буоллай бу аат эрийбэтэҕэ? Төһөлөөх уһун утуйбат түүннэригэр күүтэр этэй бу нүөмэртэн саатар быыкаа суругу, телефонунан аҕыйах тыл бырахсан кэпсэтиини. Суох туох да кэлбэтэҕэ. Аны кэлэн туох да буолбатаҕын курдук өссө эрийэр. Телефонун без звука туруорда.
    -.Оттон бу Кындыл - Манчаары - романа, наһаа да умсугуйан хаста да төхтүрүйэн аахпытым - Айта намыын куолаһа илэ олоххо төннөрдө. Үчүгэйиэн бу дьиэҕэ, бу сылаас, киһилии эйгэҕэ..
    - Чэ, Ника чаас ыраатта дии дьиэлиирин буолуо дии билигин, мин эйиэхэ бэрэскии бэрсэн ыытыам..
    Никита дьиэтигэр кэлэн телефонун көрдө. 12 пропущеннай звонок Таняттан. Ватсабын арыйбыта хаһан эрэ заблокируйдаабыт урукку кэргэнэ ону көтүрэн, киниэхэ суруйбут, өссө элбэх голосовой ыыппыт.
    - Прости я была неправа, давай начнем все сначала, уруккубут курдук бииргэ буолуохха, помнишь.как мы были счастливы, прости меня, все у нас получится, все будет хорошо - диэн бөҕө суруйбут.
    Тиһэҕэр голосовой сообщение арыйбыта дьахтара олох да холуочук ытыы олорор.эбит- Можно я приду к тебе, мне очень одиноко, прости меня - диэн бөҕө ыыппыт.
    Ника бастаан кырдьык урукку олоҕун аргыһын аһынна. Онтон Айтаны уонна Таняны тэҥнии санаата. Сир уонна хайа. Биир ууга иккистээн киирбэттэр. Урукку аны хатыламмат. Айталаах кинини билигин саҥа олох аартыга күүтэр, сырдык, ыраас, ыраахха угуйар саҕахтардаах.

    0
  • тиинч
    28 апреля 2020
     

    Салгыыта баар дуо?

    0
  • Урсууна
    7 мая 2020
     

    thumbs up signthumbs up signthumbs up sign

    0
  • Василиса
    10 мая 2020
     

    наьаа учугэй, сал5ыытын куутэбин

    0
Обратная связь