Сахалыы хоһооннор
At_Last  -    1543
Семен Данилов, "Саха үҥкүүтэ"
Е. Степановаҕа
Цитата:
Үрүмэччи үөрүн курдук,
Арыы-дьэҥкир халлаан курдук,
Көөнньөрүүлэх кымыс курдук,
Көҥүл санаа кыымын курдук
Дьоллоох саха кыргыттара
Чороон тутан таҕыстылар.

Ойуу-дьарҕаа тирэҥсэлэр
Оhуор үктээн киирдилэр,
Нуоҕай лабаа ииллиилэр,
Дьол ырыатын тистилэр...
Yөрэ сохпүт санаабар
Алаас тыала ил гынар.

Чуумпу Лена долгунуунуу,
Туундара үрүҥ кубатыныы,
Алаас хотун хатыҥыныы,
Атан эрэр ньургуhуннуу,
Намыыннарын, наскылларын,
Нарыннарын баҕастарын!

Кэрэ бэлиэ кэпсээн курдук,
Сэрэтиилээх сэhэн курдук,
Ылбай чаҕаан ырыа курдук,
Ыраас таптал тылын курдук
Сахам намыын үҥкүүтэ
Сахам сирин кэриэтэ!

***
Сарсыарда

Барыҥый халлаантан быкпыт,
Тыҥ хатыыта кырыылаах-
Ол барыйа багдаспыт-
Буор хайалар быhыылаах.

Ыраах өрүһүм дуораанын
Бастакы сиккиэр аҕалла.
Онтон ол уорас дуораанныын
Уостан уҕараан хаалла.

Чочумча чуумпу кэнниттэн
Сир симэҕэ сибигинээтэ,
Мыраан чыпчаалын сибэккитэ
Көмүс сарыалга сөтүөлээтэ.

Намылхай чараҥ тыалырга,
Эрдэhит чыычаах уhугунна,
Сарсыарда, намыын сарсыарда,
Саҥа күнэ аhылынна.

Саҥа күн күлүмэх күлүмэр
Умайар халлаан бэрдин!-
...Саҥа күн күлүмэх түбүгэр
Мин умсарга бэлэммин.Бастакы хаар хоhооҥҥо олоҕуран


Маҥнайгы хаар

Сэмэн Данилов тыллара
Виталий Андросов мелодията


Сыhыылар сырдыктар,
Чараҥнар наҕыллар,
Аан дойду сүктэр кыыс
Таҥаhын таҥынна:

Сүктэр кыыс кэриэтэ
Кыырпаҕа суох ыраас,
Сүктэр кыыс кэриэтэ
Хаар намыын үҥкүүтэ.

Мин суолга наадыйбат
Айанньыт буолабын.
Мырааны быhабын,
Чагдаҕа тахсабын.

Туллуктар суолларын
Көрөммүн үөрэбин,
-- Туллуктар! Эй, кэлин!
Мин үтүө киhибин.


Таптаа

Таптаа, бу сир оҕото
Таптаа сири, халлааны!
Yрдүк үөрүү, хомолто
Таптыыр сүрэх талаана.
Таптыыр сүрэх араарар
Куhаҕантан күндүнү,
Кини эрэ бас билэр
Сибэккини,
Дьолу,
Күнү.

Таптаабатах сүрэххэ
Дьон,
Сир,
Олох-барыта
Бороҥ буолан көстүөҕэ,
Чуҥкук буолуо барыта.

Таптаа дьон, сир кэрэтин!
Таптаа!..
Таптаа күн курдук,
Чуҥкук олох кэриэтин
Олорботох да ордук.

Yрдүк үөрүү, хомолто
Таптыыр сүрэх талаана.
Таптаа, бу сир оҕото,
Таптаа сири, халлааны.

[Сообщение редактировалось]

Ответов 3
  • At_Last
    9 ноября 2016

    Петр Тобуруоков
    Доҕордоһуу тойуга
    Доҕордуу дьоҥҥо
    Ыарахан чэпчиир
    Доҕордуу дьоҥҥо
    Ыраах да чугаһыыр
    Ким хорсун доҕордоох
    Ол дьоллоох
    Доҕордуу дьоҥҥо
    Тымныыга сылаас
    Доҕордуу дьоҥҥо
    Куйааска сөрүүн
    Доҕордуу дьону
    Дьон – сэргэ таптыыр
    Доҕордуу дьону
    Ийэ сир хайгыыр

    [Сообщение редактировалось]
    0
  • At_Last
    9 ноября 2016

    Алампа
    Ньургунуннааҕар ньуолдьаҕай ньуурдаах,
    Ньаалаҕайдааҕар намчы лабаалаах,
    Сибэккитээрэр тэтэркэй имҥээх,
    Күөх уу долгунун курдук
    Күөгэлдьигэс бэйэлээх
    Көмүс доҕорум.
    Хардыылаабакка халбарыйан,
    Атыллаабакка арахсан,
    Уҥа түннүгүм аннынан
    Уу курдук устан
    Унаарыйан ааспыккын
    Одуулаан турбутум,
    Олус уйадыйбытым.
    Онуоха эн,
    Санаабын таппыт курдук,
    Саҥата суох салаллан
    Санныҥ үрдүнэн
    Салаҥ сайаҕастык
    Сандаарыччы көрбүккүн
    Сааным тухары
    Санны сылдьыам,
    Өлуөрүм тухары
    Өйдүү сылдьыам...

    [Сообщение редактировалось]
    0
  • At_Last
    10 ноября 2016

    Арбита
    Таптыыбын оһуордаах ыйдаҥа
    Тыла суох имэҥнээх ырыатын
    Сулустан сулуска кыйдаран
    Сүрэҕим дьиктилээх ырыатын
    Таптыыбын тумарык туманы
    Тылбынан курдаттыы сүүрэрбин
    Чынайар чыпчаалга тураммын
    Чэпчэки кынаппын тиирэрбин
    Оһуордаах ыйдаҥа сырдыгар
    Сир-халлаан сибээһин көрөбүн
    Сирдээҕи тапталбыт кырдьыга
    Күндэлэс күлүктэн көрөбүн
    Оччоҕо туран дьэ билэбин
    Кэрэни кэрэхсии кэлбиппин,
    Олоҕу, дьоннору, бэйэбин
    Олустук мин таптыыр эбиппин
    Оһуордаах ыйдаҥа сырдыгар
    Соһуччу көстүбүт кистэлэҥ
    Дарбаннаах сырыыны сылдьыыга
    Чахчылаах эрэлгэ суол тэлэр.
    Таптыыбын оһуордаах ыйдаҥа
    Тыла суох имэҥнээх ырыатын
    Сырдыгы кытта хараҥа
    Силбэһэр көстүбэт кынатын

    0
Обратная связь